గుదిమల్ల తండా రామాలయ నిర్మాణానికి రూ.20 వేల విరాళం

 

ఆర్థిక సహాయం అందిస్తున్న దృశ్యం

ఆర్థిక సహాయం అందజేసిన బీఆర్ఎస్ నేత మైబలి 

ప్రజాపక్షం/ ఖమ్మం రూరల్: ఎదులాపురం మున్సిపాలిటీ పరిధిలోని గుదిమల్ల తండాలో నిర్మాణంలో ఉన్న శ్రీ రాముడు నూతన ఆలయ నిర్మాణానికి బీఆర్ఎస్ నాయకుడు మైబలి రూ.20 వేల ఆర్థిక సహాయాన్ని బుధవారం అందజేశారు. గ్రామ భక్తులు, ఆలయ నిర్మాణ కమిటీ సభ్యుల విజ్ఞప్తి మేరకు ఆలయ నిర్మాణ స్థలాన్ని సందర్శించిన ఆయన, పనుల పురోగతిని పరిశీలించి తన వంతు సహకారంగా విరాళాన్ని అందించారు.ఈ సందర్భంగా మైబలి మాట్లాడుతూ గ్రామాల్లో దేవాలయాలు కేవలం ఆరాధనా కేంద్రాలే కాకుండా ఆధ్యాత్మిక చైతన్యానికి, సామాజిక ఐక్యతకు ప్రతీకలుగా నిలుస్తాయని అన్నారు. భక్తుల సహకారంతో నిర్మితమవుతున్న రామాలయం గ్రామ ప్రజలకు ఆధ్యాత్మిక కేంద్రంగా మారడంతో పాటు యువతలో సంప్రదాయ విలువల పట్ల అవగాహన పెంపొందించేందుకు దోహదపడుతుందని పేర్కొన్నారు. ధార్మిక కార్యక్రమాలు, దేవాలయాల అభివృద్ధికి ప్రతి ఒక్కరూ తమ వంతు సహకారం అందించాలని పిలుపునిచ్చారు.గుదిమల్ల తండాలో చాలా కాలంగా ఎదురుచూస్తున్న నూతన రామాలయ నిర్మాణ పనులు ప్రస్తుతం వేగంగా కొనసాగుతున్నాయి. నిర్మాణానికి అవసరమైన నిధుల సమీకరణలో గ్రామస్తులు, దాతలు ముందుకు వస్తుండగా, మైబలి అందించిన విరాళం పనులకు తోడ్పడనుందని ఆలయ కమిటీ సభ్యులు తెలిపారు.ప్రజా సమస్యల పరిష్కారంతో పాటు సామాజిక, ఆధ్యాత్మిక కార్యక్రమాలకు కూడా అండగా నిలుస్తున్న మైబలి సేవలను వారు అభినందించారు. గ్రామ ప్రజల కలగా ప్రారంభమైన ఈ ఆలయ నిర్మాణానికి వివిధ వర్గాల నుంచి వస్తున్న సహకారం సంతోషకరమని కమిటీ సభ్యులు పేర్కొంటూ మైబలికి ప్రత్యేక కృతజ్ఞతలు తెలిపారు.ఈ కార్యక్రమంలో గ్రామ పెద్దలు, ఆలయ నిర్మాణ కమిటీ సభ్యులు, భక్తులు, మహిళలు, యువకులు, బీఆర్ఎస్ పార్టీ కార్యకర్తలు పాల్గొన్నారు.