'హ్యాపీ'గా ఉండాల్సిన ఆ ఇంట.. కన్నీళ్లే మిగిలాయి!

అమ్మ ఒడిలో ఆడుకోవాల్సిన పసిపాప.. 14  నెలలకే అనంత లోకాలకు

 కన్నీరు మున్నీరైన తల్లిదండ్రులు.. తీర్థాల గ్రామంలో విషాదఛాయలు

ప్రజాపక్షం/ఖమ్మం రూరల్: ఆ చిన్నారి నవ్వులే ఆ ఇంటికి వెలుగులు.. ఆ పసిపాప బుడిబుడి అడుగులే ఆ తల్లిదండ్రులకు వెయ్యేనుగుల బలం.. తన ముద్దు ముద్దు చేష్టలతో ఇంటిల్లిపాదినీ మురిపిస్తూ సాగిన ఆ బాల్యానికి ఎంతో సంతోషంగా హ్యాపీ అనే పేరు పెట్టుకున్నారు.. కానీ విధి వక్రించడంతో అర్ధాంతరంగా హ్యాపీగా సాగుతున్న కుటుంబంలో ఒక్కసారిగా కన్నీళ్లే మిగిలాయి. అమ్మ ఒడిలో హాయిగా నిద్రపోవాల్సిన వయసులోనే మృత్యువు ఆ చిన్నారిని కబళించింది. నిన్నటి వరకు ఇంటంతా కలియతిరిగిన తమ బిడ్డ.. నేడు విగతజీవిగా మారడంతో ఆ తల్లిదండ్రుల గుండె పగిలేలా రోదిస్తున్నారు. తమ జీవితాల్లో వెలుగులు నింపిన పసిపాప ఇక లేదన్న నిజాన్ని జీర్ణించుకోలేక కన్నీరుమున్నీరవుతున్నారు. కేవలం 14 నెలల వయసులోనే చిన్నారి హ్యాపీ మృతి చెందడంతో ఖమ్మం రూరల్ మండలం తీర్థాల గ్రామంలో విషాదఛాయలు అలుముకున్నాయి.

రెండు రోజుల అనారోగ్యం.. అంతలోనే తీరని విషాదం!

తీర్థాల గ్రామానికి చెందిన బానోత్ సునీల్, అంజలి దంపతుల కుమార్తె హ్యాపీకి జ్వరం రావడంతో రెండు రోజుల క్రితం ఖమ్మంలోని అంకురా ఆసుపత్రిలో చేర్పించారు. తమ బిడ్డకు నయమై తిరిగి ఇంటికి వస్తుందని, మళ్లీ తమ కళ్లముందు నవ్వుతూ ఆడుకుంటుందని ఆ తల్లిదండ్రులు ఆశగా ఎదురుచూశారు. కానీ వారి ఆశలను కాలం కాటేసింది. బంధువులు తెలిపిన వివరాల ప్రకారం.. ఆసుపత్రిలో చికిత్స పొందుతున్న సమయంలో చిన్నారికి ఫిట్స్ రావడంతో పాటు బ్రెయిన్ స్ట్రోక్ వచ్చినట్లు సమాచారం. చిన్నారి పరిస్థితి విషమించడంతో వైద్యులు చికిత్స అందించినప్పటికీ ఫలితం లేకపోయింది. చివరకు మంగళవారం సాయంత్రం ఆ పసిపాప తుదిశ్వాస విడిచింది.

బిడ్డ కోసం తల్లిదండ్రుల ఆరాటం.. కన్నీళ్లుగా మిగిలిన ఆశలు!

కన్నబిడ్డకు చిన్న జ్వరం వచ్చినా తల్లడిల్లిపోయే తల్లిదండ్రులు.. తమ పాపకు ఏమీ కాకూడదని, ఎలాగైనా బతికి తిరిగి రావాలని ఎన్నో ఆశలు పెట్టుకున్నారు. వైద్యులు చికిత్స అందిస్తున్నారన్న ఆశతో గడిపిన ఆ క్షణాలు.. చివరకు జీవితంలో మరిచిపోలేని విషాదాన్ని మిగిల్చాయి. తమ చేతులతో ఎత్తుకుని ముద్దాడిన బిడ్డను తిరిగి ఇంటికి తీసుకెళ్లలేని దుస్థితి ఆ తల్లిదండ్రులను కుంగదీసింది. అమ్మా అని పిలవడం కూడా పూర్తిగా నేర్చుకోని పసిపాప.. తల్లిదండ్రులకు జీవితాంతం మరిచిపోలేని శోకాన్ని మిగిల్చి వెళ్లిపోయింది.

ఆ ఇంటి నవ్వులు మాయం.. గ్రామమంతా విషాదం!

చిన్నారి మరణవార్తతో బంధువులు, గ్రామస్తులు దిగ్భ్రాంతికి గురయ్యారు. నిన్నటి వరకు పాప నవ్వులతో సందడిగా ఉన్న ఆ ఇంట్లో నేడు విషాదం అలుముకుంది. బిడ్డను తలుచుకుంటూ తల్లిదండ్రులు చేస్తున్న రోదనలు చూసి అక్కడున్నవారి కళ్లూ చెమ్మగిల్లాయి. తమ గుండెలపై ఆడుకోవాల్సిన పసిపాప ఇలా అర్ధాంతరంగా దూరమవుతుందని ఎవరూ ఊహించలేకపోయారు. ఆడుతూ పాడుతూ బాల్యాన్ని ఆస్వాదించాల్సిన వయసులోనే హ్యాపీ జీవితం ముగిసిపోవడం ప్రతి ఒక్కరినీ కలచివేసింది. తల్లిదండ్రుల ఒడిలో పెరిగి, కుటుంబానికి ఎన్నో మధుర జ్ఞాపకాలను అందించాల్సిన ఆ చిన్నారి.. తిరిగిరాని లోకాలకు వెళ్లిపోయింది. పసిపాప భౌతికంగా దూరమైనా, ఆమె నవ్వులు.. బుడిబుడి అడుగులు.. ముద్దు ముద్దు జ్ఞాపకాలు ఆ తల్లిదండ్రుల గుండెల్లో ఎప్పటికీ చెరిగిపోని గుర్తులుగా మిగిలిపోనున్నాయి. హ్యాపీ మృతితో తీర్థాల గ్రామంలో విషాద ఛాయలు అలుముకున్నాయి.