ఎర్రజెండా నీడలో విజయోత్సాహం.. సిపిఐ శ్రేణుల కదనోత్సవం!

 

ఏఐటీయూసీ గెలుపుతో ఖమ్మం రూరల్‌లో కమ్యూనిస్టుల సంబరాలు

సిపిఐ ఆధ్వర్యంలో హోరెత్తిన విజయోత్సవ ర్యాలీ.. డీజే పాటలకు కార్యకర్తల నృత్యాలు, పటాసుల మోతతో మార్మోగిన వరంగల్ క్రాస్ రోడ్

ప్రజాపక్షం/ఖమ్మం రూరల్: ఎర్రజెండాలు రెపరెపలాడాయి.. విప్లవ గీతాలు హోరెత్తాయి.. కార్మిక విజయ నినాదాలు మార్మోగాయి.. డీజే పాటలకు కమ్యూనిస్టు శ్రేణులు ఉత్సాహంగా కాలు కదిపాయి! రాష్ట్రవ్యాప్తంగా జరిగిన ఆర్టీసీ కార్మిక సంఘం ఎన్నికల్లో ఏఐటీయూసీ విజయం సాధించడంతో భారత కమ్యూనిస్టు పార్టీ (సిపిఐ) ఆధ్వర్యంలో ఏదులాపురం మున్సిపాలిటీ పరిధిలోని వరంగల్ క్రాస్ రోడ్ సెంటర్‌లో శనివారం విజయోత్సవ సంబరాలు అంబరాన్నంటాయి. ఎర్రజెండా సాక్షిగా.. కార్మిక విజయమే ఉత్సవంగా.. సిపిఐ శ్రేణులు ఘనంగా విజయోత్సవ ర్యాలీ నిర్వహించాయి.

ఎర్రజెండాల రెపరెపలు.. అడుగడుగునా విజయోత్సాహం!

ఏఐటీయూసీ విజయాన్ని పురస్కరించుకొని సిపిఐ నాయకులు, కార్యకర్తలు పెద్ద సంఖ్యలో ర్యాలీకి తరలివచ్చారు. చేతుల్లో ఎర్రజెండాలు.. గొంతుల్లో విజయ నినాదాలు.. అడుగుల్లో ఉత్సాహం.. ఇలా వరంగల్ క్రాస్ రోడ్ ప్రాంతం ఎర్రజెండాల సందడితో కళకళలాడింది. సిపిఐ ఆధ్వర్యంలో ప్రారంభమైన ర్యాలీ వరంగల్ క్రాస్ రోడ్ సెంటర్ నుంచి వార్తా కార్యాలయం మీదుగా తిరిగి అదే కూడలికి చేరుకుంది. మార్గమంతా డీజే పాటలు, కమ్యూనిస్టు గీతాలకు నాయకులు, కార్యకర్తలు నృత్యాలు చేస్తూ విజయోత్సాహాన్ని చాటుకున్నారు. పటాసులు పేల్చి సంబరాలు జరుపుకోవడంతో ఆ ప్రాంతమంతా పండుగ వాతావరణం నెలకొంది.

కార్మిక విజయానికి సిపిఐ ఘన స్వాగతం

ఆర్టీసీ ఎన్నికల్లో ఏఐటీయూసీ సాధించిన విజయంతో సిపిఐ శ్రేణుల్లో కొత్త ఉత్సాహం కనిపించింది. కార్మిక సంఘం విజయాన్ని పురస్కరించుకొని పార్టీ ఆధ్వర్యంలో నిర్వహించిన ఈ ర్యాలీ నాయకులు, కార్యకర్తల ఉత్సాహానికి వేదికగా నిలిచింది. ఎర్రజెండాల రెపరెపల మధ్య సాగిన సంబరాలు కార్మిక ఉద్యమంతో సిపిఐకి ఉన్న అనుబంధాన్ని ప్రతిబింబించాయి. నాయకులు, కార్యకర్తలు ఒకేచోట చేరి విజయాన్ని వేడుకగా జరుపుకున్నారు.

ప్రముఖ నాయకుల హాజరు

ఈ విజయోత్సవ ర్యాలీలో సిపిఐ జిల్లా కార్యదర్శి దండి సురేష్‌తో పాటు రాష్ట్ర కార్యవర్గ సభ్యులు, జిల్లా సమితి సభ్యులు, మండల సమితి సభ్యులు, సిపిఐ కౌన్సిలర్లు, పార్టీ నాయకులు, కార్యకర్తలు పాల్గొన్నారు. ఏఐటీయూసీ జిల్లా ప్రధాన కార్యదర్శి తోట రామాంజనేయులు, ఏఐటీయూసీ ఆటో యూనియన్ జిల్లా ప్రధాన కార్యదర్శి పేరబోయిన మోహన్ రావు, జిల్లా ఉపాధ్యక్షుడు టేకుమట్ల శ్రీను, బద్దల మల్లయ్య, బీకేఎంయూ జిల్లా నాయకులు తాటి వెంకటేశ్వర్లు, సిపిఐ జిల్లా కార్యవర్గ సభ్యుడు మెడకంటి చిన్న వెంకటరెడ్డి, జిల్లా సమితి సభ్యులు చెరుకుపల్లి భాస్కర్, బానోతు రామకోటి, వెంపటి సురేందర్, సిపిఐ మండల కార్యదర్శి పుచ్చకాయల సుధాకర్, కౌన్సిలర్లు దండి రంగారావు, మామిండ్ల శ్రీనాథ్ రెడ్డి, దండి శ్రీజ తదితరులు పాల్గొన్నారు.