మా వార్డులకు కీడు వస్తుందా..?

ఫైల్ ఫొటో

ఫైల్ ఫోటో

  2017 ఘటనను గుర్తు చేస్తున్న వరుస మరణాలు

  నెల రోజుల వ్యవధిలో ఐదుగురు మృతి

  అనారోగ్యంతోనే మరణాలైనా.. ప్రజల్లో మళ్లీ అదే చర్చ

  యాదృచ్ఛిక సంఘటనలతో పాత జ్ఞాపకాలు తెరపైకి

ప్రజాపక్షం/ఖమ్మం రూరల్ : ఎదులాపురం మున్సిపాలిటీలోని అవార్డుల్లో చోటుచేసుకుంటున్న వరుస మరణాలు కొంతమందికి 2017లో జరిగిన ఘటనను గుర్తుకు తెస్తున్నాయి. అప్పట్లో ఖమ్మం రూరల్ మండల పరిధిలో గ్రామపంచాయతీగా ఉన్న ఎదులాపురంలో వరుస మరణాలు సంభవించడంతో "ఊరికి కీడు వచ్చింద"నే ప్రచారం జోరందుకుంది. దీంతో 2017 ఫిబ్రవరి 21న గ్రామస్తులు ఊరిని తాత్కాలికంగా ఖాళీ చేసి చెట్ల కింద బస చేయడం చర్చనీయాంశమైంది. ఇప్పుడు అదే ఎదులాపురం మున్సిపాలిటీగా మారిన తర్వాత 28, 31 వార్డుల పరిధిలో నెల రోజుల వ్యవధిలో ఐదుగురు మృతి చెందడం స్థానికుల్లో మళ్లీ ఆ పాత ఘటనను గుర్తు చేస్తోంది. అయితే ఈ మరణాలన్నీ అనారోగ్య సమస్యల కారణంగానే జరిగినవని కుటుంబ సభ్యులు, స్థానికులు చెబుతున్నారు. అయినప్పటికీ ఒకరి మరణం జరిగిన మరుసటి రోజే మరో మరణం సంభవించడం, తక్కువ వ్యవధిలో వరుస విషాదాలు చోటుచేసుకోవడం ప్రజల్లో చర్చకు దారితీసింది.వైద్యపరంగా చూస్తే ఇవి యాదృచ్ఛిక సంఘటనలే అయినప్పటికీ, గతంలో జరిగిన ఘటనతో పోల్చుకుంటూ కొందరు "మళ్లీ అదే పరిస్థితి వస్తుందా?" అనే సందేహాన్ని వ్యక్తం చేస్తున్నారు. అయితే మూఢనమ్మకాలకు తావివ్వకుండా, వరుస మరణాల వెనుక ఉన్న వాస్తవ కారణాలపై అవగాహన పెంపొందించాల్సిన అవసరం ఉందని పలువురు అభిప్రాయపడుతున్నారు.

9 సంవత్సరాల తర్వాత కీడు చర్చ...

ఎదులాపురం పంచాయతీగా ఉన్న సమయంలో 2017 ఫిబ్రవరి 21న గ్రామానికి కీడు వచ్చిందనే ప్రచారం నేపథ్యంలో కుల, మతాలకు అతీతంగా గ్రామస్థులు ఊరిని విడిచి వెళ్లిన విషయం అప్పట్లో చర్చనీయాంశంగా మారింది. అంతకుముందు కొంతకాలం వ్యవధిలో అనారోగ్యాలు, రోడ్డు ప్రమాదాలు తదితర కారణాలతో పలువురు మృతి చెందడంతో గ్రామస్తులు ఆందోళనకు గురయ్యారు. ఈ నేపథ్యంలో కొందరు ఓ అమ్మవారిని ఆశ్రయించి పరిస్థితిపై ఆరా తీయగా, గ్రామానికి కీడు వచ్చిందని, అందరూ ఒక రోజు పాటు గ్రామం విడిచి చెట్ల కింద ఉండి వంటలు చేసుకుని భోజనం చేసి సాయంత్రం తిరిగి గ్రామంలోకి రావాలని సూచించిందని స్థానికులు గుర్తు చేసుకుంటున్నారు. ఈ ఘటన జరిగి తొమ్మిది సంవత్సరాల తర్వాత తాజాగా నెల రోజుల వ్యవధిలో ఐదుగురు అనారోగ్య కారణాలతో మృతి చెందడం మళ్లీ ఆ సంఘటనను గుర్తు చేస్తోంది. ఈ వరుస మరణాల నేపథ్యంలో 28, 31 వార్డుల ప్రజల్లో "మళ్లీ ఏదైనా కీడు వస్తుందా?" అనే చర్చ జరుగుతోంది. అయితే ఈ మరణాలన్నీ అనారోగ్యం లేదా ఇతర కారణాలతో జరిగినవేనని, వాటికి అతీంద్రియ కారణాలు ఉన్నాయని నిర్ధారించే ఎలాంటి ఆధారాలు లేవు. అయినప్పటికీ వరుస విషాదాలు చోటుచేసుకోవడంతో ప్రజల్లో ఆందోళన, చర్చ మాత్రం కొనసాగుతోంది.

ఇంకా మూఢనమ్మకాలేనా..?

నేడు ప్రపంచం సాంకేతిక విప్లవ దిశగా వేగంగా పయనిస్తోంది. కృత్రిమ మేధస్సు, డిజిటల్ కమ్యూనికేషన్, అత్యాధునిక సమాచార వ్యవస్థలు మన జీవన విధానాన్నే మార్చేస్తున్నాయి. ఇటీవల ఢిల్లీలోని జంతర్ మంతర్ వద్ద జరిగిన విద్యార్థుల ఉద్యమంలో ఇంటర్నెట్ సేవలు నిలిపివేసిన పరిస్థితుల్లోనూ ప్రత్యేక బ్లూటూత్ ఆధారిత సాంకేతికతను ఉపయోగించి వీడియోలు దేశవ్యాప్తంగా చేరడం ఇందుకు ఒక ఉదాహరణ.ఇలాంటి సాంకేతిక పురోగతి కనిపిస్తున్నప్పటికీ, సమాజంలో మూఢనమ్మకాలు మాత్రం పూర్తిగా తగ్గిపోలేదనే అభిప్రాయం వ్యక్తమవుతోంది. వరుసగా జరిగే అనూహ్య ఘటనలు, మరణాలు లేదా ఇతర విషాదాలు చోటుచేసుకున్నప్పుడు కొందరు వాటిని 'కీడు' లేదా అతీంద్రియ కారణాలతో ముడిపెడుతుంటే, మరికొందరు అవి యాదృచ్ఛిక సంఘటనలేనని, వైద్యపరమైన లేదా ఇతర సహజ కారణాల వల్లే జరిగాయని చెబుతున్నారు. ఇటీవల ఎదులాపురం మున్సిపాలిటీలోని 28,31 వార్డుల్లో చోటుచేసుకున్న వరుస మరణాలు కూడా ఇదే తరహా చర్చకు దారితీశాయి. అయితే ఇప్పటివరకు అందుబాటులో ఉన్న సమాచారం ప్రకారం అవన్నీ అనారోగ్య సమస్యలు లేదా ఇతర సహజ కారణాల వల్లే సంభవించినవిగా తెలుస్తోంది. అయినప్పటికీ ప్రజల్లో కొందరు వాటిని మూఢనమ్మకాల కోణంలో చూడడం చర్చగా మారింది. సాంకేతికత ఎంతగా అభివృద్ధి చెందినా, శాస్త్రీయ దృక్పథం సమాజంలోని ప్రతి వర్గానికి పూర్తిగా చేరేవరకు ఇలాంటి నమ్మకాలు కొనసాగుతూనే ఉంటాయనేది సామాజిక పరిశీలకుల అభిప్రాయం.