ప్రజాదర్బార్ ఫిర్యాదుతో భద్రమ్మ భూవివాదంపై క్షేత్రస్థాయి విచారణ.. సర్వే నివేదికపై ఉత్కంఠ

 ప్రజాదర్బార్ ఫిర్యాదుతో కదిలిన రెవెన్యూ యంత్రాంగం

ఖమ్మం రూరల్: రాష్ట్ర రెవెన్యూ, గృహ నిర్మాణ, సమాచార శాఖ మంత్రి పొంగులేటి శ్రీనివాస్‌రెడ్డి నిర్వహించిన ప్రజాదర్బార్‌లో గోళ్లపాడు గ్రామానికి చెందిన వెలుతురు భద్రమ్మ చేసిన ఫిర్యాదు నేపథ్యంలో రెవెన్యూ అధికారులు భూవివాదంపై క్షేత్రస్థాయి విచారణ శుక్రవారం చేపట్టారు. తహసీల్దార్ విజయేంద్రరెడ్డి ఆదేశాల మేరకు ఖమ్మం రూరల్ సర్వేయర్ వినోద్‌కుమార్ 309, 310 సర్వే నంబర్లలో భూమిని పరిశీలించి, రికార్డులు, సరిహద్దులు, విస్తీర్ణం, క్షేత్రస్థాయి పరిస్థితులను పరిశీలించారు.

పాత పత్రాలు, వారసత్వ ఆధారాల పరిశీలన

విచారణలో భాగంగా భద్రమ్మ వద్ద ఉన్న వారసత్వ, రిజిస్ట్రేషన్ పత్రాలతో పాటు లంజపల్లి కుటుంబానికి చెందిన 1965 భూ కొనుగోలు పత్రాలు, చిన్న వెంకయ్య కొనుగోలు చేసిన భూమికి సంబంధించిన ఆధారాలను కూడా అధికారులు పరిశీలించినట్లు తెలిసింది. లంజపల్లి కుటుంబ సభ్యులు, పెద్దల నుంచి వివరాలు సేకరించడంతో పాటు సోషల్ మీడియాలో వచ్చిన ఆరోపణలపైనా వాస్తవాలను తెలుసుకునే ప్రయత్నం చేసినట్లు సమాచారం.

భూమి హక్కులు, సరిహద్దులపై దృష్టి

భూమి అసలు ఎక్కడ ఉంది, రికార్డుల్లో నమోదైన విస్తీర్ణం క్షేత్రస్థాయిలో సరిపోతుందా, భద్రమ్మకు వారసత్వ హక్కులు ఏమిటి, చిన్న వెంకయ్య నుంచి భూమి ఎవరెవరి పేర్లకు బదిలీ అయింది, ప్రస్తుతం ఎవరి పేరులో ఉంది, ఎస్సీ వర్గానికి చెందిన భూముల కొనుగోలు, విక్రయాలకు సంబంధించిన ఆరోపణల్లో వాస్తవాలు ఏమిటనే అంశాలను అధికారులు పరిశీలిస్తున్నారు. పాత రిజిస్ట్రేషన్ పత్రాలు, లింక్ డాక్యుమెంట్లు, రెవెన్యూ రికార్డులు, వారసత్వ ఆధారాల ఆధారంగా భూమి యాజమాన్య క్రమాన్ని నిర్ధారించే ప్రక్రియ కొనసాగుతోంది.

సర్వే నివేదికపై ఉత్కంఠ

మంత్రి పొంగులేటి శ్రీనివాస్‌రెడ్డి ప్రజాదర్బార్‌లో అందిన ఫిర్యాదుపై అధికారులు స్పందించి క్షేత్రస్థాయిలో విచారణ చేపట్టడం ప్రాధాన్యత సంతరించుకుంది. భూమి హక్కులు, సరిహద్దులు, విస్తీర్ణం, రికార్డులు, వారసత్వ ఆధారాలు, క్షేత్రస్థాయి పరిస్థితులపై అధికారులు సమర్పించే సర్వే నివేదికలో ఏం తేలుతుందన్న దానిపై స్థానికంగా ఉత్కంఠ నెలకొంది. సమగ్ర విచారణ, రికార్డుల పరిశీలన, సర్వే నివేదిక అనంతరమే భూవివాదంపై పూర్తి స్పష్టత వచ్చే అవకాశం ఉందని అధికారులు భావిస్తున్నారు.