సంప్రదాయ, ఆధునిక దుస్తుల్లో మెరిసిన విద్యార్థులు.. నృత్యాలతో హోరెత్తిన కళాశాల ప్రాంగణం
ప్రజాపక్షం/ ఖమ్మంరూరల్: ఏదులాపురం మున్సిపాలిటీ పరిధిలోని సత్యనారాయణపురంలో ఉన్న దరిపల్లి అనంత రాములు కాలేజ్ ఆఫ్ ఇంజనీరింగ్ అండ్ టెక్నాలజీలో నూతన విద్యార్థులకు స్వాగతం పలుకుతూ నిర్వహించిన ఫ్రెషర్స్ డే వేడుకలు శుక్రవారం అట్టహాసంగా జరిగాయి. బీటెక్, పాలిటెక్నిక్ డిప్లొమా విద్యార్థులు ఉత్సాహంగా పాల్గొనడంతో కళాశాల ప్రాంగణం సందడిగా మారింది. సంప్రదాయ, ఆధునిక దుస్తుల్లో విద్యార్థినీ విద్యార్థులు ప్రత్యేక ఆకర్షణగా నిలవగా, వారి నృత్య ప్రదర్శనలు సభికులను ఉర్రూతలూగించాయి.
విద్యార్థులకు దిశానిర్దేశం చేసిన ప్రిన్సిపల్ డాక్టర్ దరిపల్లి కిరణ్
ఈ కార్యక్రమానికి ముఖ్య అతిథిగా హాజరైన కళాశాల ప్రిన్సిపల్ డాక్టర్ దరిపల్లి కిరణ్ మాట్లాడుతూ.. ఫ్రెషర్స్ డే అనేది నూతన విద్యార్థులకు సీనియర్లతో పరిచయం ఏర్పరచుకోవడానికి, కళాశాల వాతావరణానికి అలవాటు పడేందుకు చక్కని వేదిక అని పేర్కొన్నారు. సీనియర్ విద్యార్థులు జూనియర్లకు ఆదర్శంగా నిలవాలని, వారిలోని మంచి లక్షణాలను అనుసరిస్తూ ముందుకు సాగాలని సూచించారు. కష్టపడే ప్రతి విద్యార్థికి విజయావకాశాలు మెరుగవుతాయని, లక్ష్యసాధనకు క్రమశిక్షణ, పట్టుదల ఎంతో అవసరమని ఉద్బోధించారు.
44 ఏళ్ల విద్యా ప్రస్థానం.. విద్యార్థుల భవిష్యత్తే లక్ష్యం
కార్యక్రమానికి విశిష్ట అతిథిగా హాజరైన కళాశాల కరస్పాండెంట్, వాణి ఐటీఐ ప్రిన్సిపల్ దరిపల్లి స్వాతి మాట్లాడుతూ.. శ్రీ దరిపల్లి అనంత రాములు విద్యారంగంలో ఎన్నో విద్యాసంస్థలను నెలకొల్పి విద్యాభివృద్ధికి కృషి చేశారని తెలిపారు. ఆయన స్థాపించిన విద్యాసంస్థలు 44 సంవత్సరాల విద్యా ప్రస్థానాన్ని పూర్తి చేసుకోవడం సంతోషకరమన్నారు. సీనియర్ విద్యార్థులు జూనియర్లకు మంచి మార్గదర్శకులుగా నిలవాలని, అధ్యాపకుల సూచనలు పాటిస్తూ విద్యలో ఉన్నత శిఖరాలను అధిరోహించాలని ఆకాంక్షించారు.
విద్యతోపాటు అన్ని రంగాల్లో రాణించాలి
కళాశాల వైస్ ప్రిన్సిపల్ అలువాల వెంకట్ మాట్లాడుతూ.. విద్యార్థులు చదువుతోపాటు ఇతర రంగాల్లోనూ ప్రతిభ చాటాలని సూచించారు. ముఖ్యంగా ప్రాక్టికల్స్‌ను శ్రద్ధగా నిర్వహిస్తూ సాంకేతిక పరిజ్ఞానాన్ని పెంపొందించుకోవాలని, అప్పుడే తమ లక్ష్యాలను సాధించేందుకు అవసరమైన నైపుణ్యాలు అలవడతాయని తెలిపారు.కళాశాల వివిధ విభాగాల అధిపతులు మాట్లాడుతూ.. విద్యార్థులు ఇష్టంతో, కష్టపడి చదివి భవిష్యత్తులో ఉన్నత స్థానాలకు చేరుకోవాలని పిలుపునిచ్చారు.
నూతన ఆవిష్కరణలకు ప్రాధాన్యం ఇవ్వాలి
డిప్లొమా కోఆర్డినేటర్ ఉమారాణి మాట్లాడుతూ.. కళాశాలలో అందుబాటులో ఉన్న మౌలిక వసతులను సద్వినియోగం చేసుకొని సాంకేతిక నైపుణ్యాలను పెంపొందించుకోవాలని, నూతన ఆవిష్కరణల దిశగా అడుగులు వేయాలని విద్యార్థులకు సూచించారు.బీటెక్ కోఆర్డినేటర్ నీలిమ మాట్లాడుతూ.. విద్యార్థులు చదువుతోపాటు ఉద్యోగావకాశాలపై కూడా దృష్టి సారించాలని తెలిపారు. క్యాంపస్ రిక్రూట్‌మెంట్ డ్రైవ్‌ల ద్వారా ఉపాధి అవకాశాలను అందిపుచ్చుకునేందుకు అవసరమైన నైపుణ్యాలను అభివృద్ధి చేసుకోవాలని సూచించారు.
సందడిగా సాగిన వేడుకలు
ఈ కార్యక్రమంలో వివిధ విభాగాల అధిపతులు డాక్టర్ జాన్ వెస్లీ, పుల్లయ్య, వెంకటరావు, రామ్ కుమార్, చంద్రకళ, విజయభవాని, ప్రియ, ప్రవీణ్, రెహమతి, ప్రసన్నతో పాటు అధ్యాపకులు, విద్యార్థినీ విద్యార్థులు అధిక సంఖ్యలో పాల్గొన్నారు. ఆటపాటలు, నృత్య ప్రదర్శనలతో ఫ్రెషర్స్ డే వేడుకలు ఉత్సాహభరిత వాతావరణంలో ముగిశాయి.
إرسال تعليق