ఏఐ యుగంలో సాంకేతిక నైపుణ్యాలతో ఉన్నత లక్ష్యాలను సాధించాలి: చైర్మన్ కాటేపల్లి నవీన్ బాబు
ప్రజాపక్షం / ఖమ్మం రూరల్ : ఎదులాపురం మున్సిపాలిటీ పరిధిలోని ప్రియదర్శిని మహిళా ఇంజనీరింగ్ కళాశాల( అటారమస్) లో నూతన విద్యార్థినులకు స్వాగతం పలుకుతూ శుక్రవారం ఫ్రెషర్స్ డే వేడుకలను ఘనంగా నిర్వహించారు. స్నేహం, సంతోషం, సాంస్కృతిక ప్రదర్శనలతో కళాశాల ప్రాంగణం సందడిగా మారింది. విద్యార్థినుల్లో ఆత్మవిశ్వాసం, నాయకత్వ లక్షణాలు, సృజనాత్మకతను పెంపొందించడమే లక్ష్యంగా వేడుకలు ఆకట్టుకున్నాయి.
మహిళా సాధికారతే ప్రియదర్శిని లక్ష్యం
ఈ సందర్భంగా కళాశాల చైర్మన్ కాటేపల్లి నవీన్ బాబు మాట్లాడుతూ, ఉన్నత ఆశయాలతో కళాశాలలో అడుగుపెట్టిన నూతన విద్యార్థినులు తమ కలలను సాకారం చేసుకునేందుకు ఈ అవకాశాన్ని సద్వినియోగం చేసుకోవాలని సూచించారు. మహిళా సాధికారతే ప్రియదర్శిని విద్యాసంస్థల ప్రధాన లక్ష్యమని పేర్కొన్నారు. గ్రామీణ ప్రాంతాల మహిళలకు నాణ్యమైన సాంకేతిక విద్య అందించి, వారిలో ఆత్మవిశ్వాసం, స్వావలంబన, నాయకత్వ లక్షణాలను పెంపొందించడమే తమ ఆశయమన్నారు. ప్రస్తుత కృత్రిమ మేధస్సు (ఏఐ) యుగంలో విద్యార్థినులు మారుతున్న సాంకేతిక పరిజ్ఞానాన్ని నిరంతరం నేర్చుకుంటూ, పరిశ్రమల అవసరాలకు అనుగుణంగా నైపుణ్యాలను పెంపొందించుకోవాలని సూచించారు.కేవలం డిగ్రీ సాధించడమే కాకుండా, ఉద్యోగాలు పొందడంతో పాటు భవిష్యత్తులో ఇతరులకు ఉద్యోగాలు కల్పించే పారిశ్రామికవేత్తలుగా ఎదగాలని పిలుపునిచ్చారు. క్రమశిక్షణ, పట్టుదల, సమయపాలనతో లక్ష్యాల సాధనకు కృషి చేయాలని, తల్లిదండ్రుల ఆశయాలను నెరవేర్చుతూ కళాశాలకు మంచి పేరు తీసుకురావాలని ఆకాంక్షించారు.
ఏఐ, సాంకేతిక నైపుణ్యాలపై ప్రత్యేక శిక్షణ
కళాశాల ప్రిన్సిపాల్ డాక్టర్ బత్తుల గోపాల్ మాట్లాడుతూ, విద్యార్థినులకు నాణ్యమైన సాంకేతిక విద్యతో పాటు సమగ్ర వ్యక్తిత్వ వికాసానికి కళాశాల ప్రాధాన్యతనిస్తోందని తెలిపారు. టాస్క్, ఐసీటీ అకాడమీ, ఇన్ఫోసిస్ వంటి సంస్థల సహకారంతో పరిశ్రమలకు అవసరమైన నైపుణ్యాలను పెంపొందించే శిక్షణ కార్యక్రమాలు నిర్వహిస్తున్నట్లు వివరించారు. మైక్రోసాఫ్ట్ ఆధ్వర్యంలోని నైపుణ్యాభివృద్ధి కేంద్రం ద్వారా ఏఐ సాంకేతిక పరిజ్ఞానంపై ఉచిత శిక్షణ, అవగాహన కార్యక్రమాలు అందిస్తున్నట్లు పేర్కొన్నారు. విద్యార్థినులు కేవలం పాఠ్యపుస్తకాలకే పరిమితం కాకుండా ఆచరణాత్మక జ్ఞానం, నూతన ఆలోచనలు, నిరంతర అభ్యాసంతో తమ ప్రతిభను మెరుగుపరుచుకోవాలని సూచించారు.కళాశాలలోని సంస్థాగత ఆవిష్కరణల మండలి ద్వారా పరిశోధన, అభివృద్ధి, నూతన ఆవిష్కరణలు, వ్యాపార ఆలోచనలను ప్రోత్సహిస్తున్నట్లు తెలిపారు. విద్యార్థినులు ప్రాజెక్టులు, సాంకేతిక పోటీలు, ఆవిష్కరణ కార్యక్రమాల్లో చురుకుగా పాల్గొని భవిష్యత్తులో నైపుణ్యవంతులైన ఇంజనీర్లుగా ఎదగాలని పిలుపునిచ్చారు.
బాధ్యతాయుతమైన పౌరులుగా ఎదగాలి
కళాశాల అకడమిక్ డైరెక్టర్ అట్లూరి వెంకట రమణ మాట్లాడుతూ, ప్రథమ సంవత్సరం విద్యార్థినులు సీనియర్లతో స్నేహపూర్వకంగా మెలుగుతూ పరస్పర సహకారం, గౌరవం, ఐక్యతతో విద్యా ప్రయాణాన్ని కొనసాగించాలని సూచించారు. కష్టపడి చదివి తల్లిదండ్రుల ఆశయాలను నెరవేర్చడంతో పాటు, మంచి వ్యక్తిత్వాన్ని పెంపొందించుకొని సమాజానికి ఉపయోగపడే బాధ్యతాయుతమైన పౌరులుగా ఎదగాలని ఆకాంక్షించారు.
నృత్య ప్రదర్శనలతో సందడిగా వేడుకలు
కార్యక్రమ ప్రారంభంలో విద్యార్థినులు ప్రదర్శించిన స్వాగత నృత్యం ప్రత్యేక ఆకర్షణగా నిలిచింది. అనంతరం నిర్వహించిన వివిధ నృత్య ప్రదర్శనలు, సాంస్కృతిక కార్యక్రమాలు సభికులను అలరించాయి. ప్రథమ, ద్వితీయ సంవత్సరం విద్యార్థినులు ఉత్సాహంగా పాల్గొని వేడుకలకు మరింత శోభను తీసుకొచ్చారు.ఈ కార్యక్రమంలో హ్యూమానిటీస్ అండ్ సైన్సెస్ విభాగాధిపతి ఎన్. అనిత, కంప్యూటర్ సైన్స్ అండ్ ఇంజనీరింగ్ విభాగాధిపతి ఐ. నరసింహారావు, ఎలక్ట్రానిక్స్ అండ్ కమ్యూనికేషన్ ఇంజనీరింగ్ విభాగాధిపతి డి. రమేష్, బీసీఏ విభాగాధిపతి జి. హరికృష్ణ, సాంస్కృతిక కార్యక్రమాల సమన్వయకర్త ఆర్.ఎన్. ప్రసాద్, బోధన, బోధనేతర సిబ్బంది, విద్యార్థినులు పాల్గొన్నారు.
إرسال تعليق