రామకృష్ణ–నాసిర్ బేగం జీవిత ప్రయాణం నేటి యువతకు స్ఫూర్తి: కౌన్సిలర్ నాగేంద్ర ప్రసాద్
ప్రజాపక్షం / ఏదులాపురం: సమాజంలో విజయాన్ని సంపాదించాలంటే సంపద కాదు.. సంకల్పమే ముఖ్యం అని మరోసారి నిరూపించిన దంపతులు రామకృష్ణ–నాసిర్ బేగం. పేద కుటుంబ నేపథ్యం నుంచి జీవితాన్ని ప్రారంభించి, కుల–మత భేదాలకు అతీతంగా ప్రేమ వివాహం చేసుకుని, ఎన్నో ఒడిదుడుకులను ఎదుర్కొంటూ తమ కష్టార్జితంతో స్వంత ఇంటిని నిర్మించుకోవడం స్థానికంగా ప్రశంసలు అందుకుంటోంది.ఏదులాపురం మున్సిపాలిటీ 5వ వార్డులో నూతనంగా నిర్మించిన వారి స్వగృహంలో ఆదివారం నిర్వహించిన గృహప్రవేశ మహోత్సవానికి 5వ వార్డు కౌన్సిలర్ నాగేంద్ర ప్రసాద్, 26వ వార్డు కౌన్సిలర్ బానోత్ దివ్య, 27వ వార్డు కౌన్సిలర్ భూక్యా పుల్‌చంద్, 7వ వార్డు కౌన్సిలర్ బుర్ర మహేష్ హాజరై దంపతులను అభినందించి శుభాకాంక్షలు తెలిపారు.ఈ సందర్భంగా కౌన్సిలర్ నాగేంద్ర ప్రసాద్ మాట్లాడుతూ, "మన వార్డులో ఇలాంటి ఆదర్శ దంపతులు ఉండటం ప్రతి ఒక్కరికీ గర్వకారణం. జీవితంలో ఎదురయ్యే సమస్యలను చూసి వెనక్కి తగ్గకుండా, వాటినే విజయానికి మెట్లుగా మార్చుకున్న తీరు అభినందనీయం" అని అన్నారు.ప్రైవేట్ ఉద్యోగం చేస్తూనే ప్రభుత్వ ఉద్యోగాన్ని లక్ష్యంగా పెట్టుకుని నిరంతరం శ్రమించడం, ఆర్థిక ఇబ్బందులు ఎదురైనా చదువును కొనసాగించడం, కుటుంబ బాధ్యతలను సమర్థంగా నిర్వహించడం వారి వ్యక్తిత్వానికి నిదర్శనమని పేర్కొన్నారు. లక్ష్య సాధన కోసం క్రమశిక్షణ, కష్టపడే తత్వం, పరస్పర నమ్మకం ఎంత ముఖ్యమో ఈ దంపతులు తమ జీవితంతో నిరూపించారని చెప్పారు.కుటుంబ విలువలు, పరస్పర గౌరవం, ప్రేమ, సహనం, ఆత్మవిశ్వాసంతో ముందుకు సాగుతున్న వారి దాంపత్య జీవితం నేటి యువతకు ఆదర్శంగా నిలుస్తోందన్నారు. కుల–మత భేదాలకు అతీతంగా మానవీయ విలువలకు ప్రాధాన్యం ఇస్తూ కుటుంబాన్ని నిర్మించుకున్న ఈ దంపతులు సామాజిక ఐక్యతకు ప్రతీకగా నిలిచారని కొనియాడారు.రామకృష్ణ–నాసిర్ బేగం దంపతులు జీవితంలో మరెన్నో విజయాలు సాధించాలని, ప్రభుత్వ ఉద్యోగ లక్ష్యాన్ని చేరుకుని సమాజంలో మరింత ఉన్నత స్థాయికి ఎదగాలని ఆకాంక్షిస్తూ ప్రజాప్రతినిధులు శుభాకాంక్షలు తెలిపారు.గృహప్రవేశ వేడుకకు స్థానిక పెద్దలు, కాలనీవాసులు, బంధుమిత్రులు పెద్ద సంఖ్యలో హాజరై నూతన గృహ యజమానులను ఆశీర్వదించారు. ఆధ్యాత్మిక వాతావరణంలో నిర్వహించిన ఈ కార్యక్రమం ఆనందోత్సాహాల మధ్య ముగిసింది.
إرسال تعليق