ఇంటికి పండగ వెలుగులు రావాల్సిన వేళ.. చావు చీకట్లు కమ్ముకున్నాయి

 అప్పుల బాధతో కుటుంబంలో విషాదం.. తండ్రి, కూతురు మృతి

ఆస్పత్రిలో కుమారుడు..అప్పలనరసింహాపురంలో కన్నీరుమున్నీరైన కుటుంబ సభ్యులు

ప్రజాపక్షం / నేలకొండపల్లి: ఇంటికి పండగ వెలుగులు రావాల్సిన వేళ.. చావు చీకట్లు కమ్ముకున్నాయి. వినాయక చవితి సందర్భంగా సందడిగా ఉండాల్సిన అప్పలనరసింహాపురం ఒక్కసారిగా విషాదంలో మునిగిపోయింది. అప్పుల భారం, వ్యవసాయ కష్టాలతో తీవ్ర మనోవేదనకు గురైన శ్రీనివాసరావు తీసుకున్న విషాద నిర్ణయం ఓ కుటుంబాన్ని చిన్నాభిన్నం చేసింది. తండ్రి, కూతురు లాస్య మృతిచెందగా.. కుమారుడు నిఖిల్‌ ఆస్పత్రిలో చికిత్స పొందుతున్నాడు. పండగ పూట పూలతో అలంకరించాల్సిన ఇంట్లోనే మృతదేహాలను చూసి కుటుంబ సభ్యులు కన్నీరుమున్నీరయ్యారు.

కళ్లముందే కూతురు.. తల్లి గుండె పగిలేలా రోదన

శ్రీనివాసరావు, లాస్య మృతదేహాలను గురువారం అప్పలనరసింహాపురం గ్రామానికి తీసుకురావడంతో విషాద వాతావరణం నెలకొంది. కూతురి మృతదేహాన్ని చూసిన తల్లి లీల తట్టుకోలేకపోయింది. “బిడ్డా.. ఒక్కసారి కళ్లు తెరవమ్మా..” అంటూ ఆమె చేసిన ఆర్తనాదాలు అక్కడున్న వారిని కంటతడి పెట్టించాయి. నిన్నటి వరకు తనతో మాట్లాడిన కూతురు ఇక లేదన్న నిజాన్ని జీర్ణించుకోలేక ఆమె రోదించిన తీరు హృదయవిదారకంగా మారింది.

పండగ కోసం వచ్చిన లాస్య.. తిరిగిరాని లోకాలకు

వినాయక చవితి సందర్భంగా లాస్య ఇంటికి రావడం కుటుంబంలో ఆనందాన్ని నింపింది. అయితే అదే పండగ రోజు కుటుంబాన్ని విషాదం వెంటాడింది. తండ్రి, కూతురు మృతిచెందడంతో ఆ ఇంటి ఆనందం ఒక్కసారిగా ఆవిరైపోయింది. పండగ సందడితో కళకళలాడాల్సిన గ్రామం.. అంతిమయాత్రతో విషాదంలో మునిగిపోయింది.

ఆస్పత్రిలో కుమారుడు.. కుటుంబ సభ్యుల్లో ఆందోళన

ఈ ఘటనలో నిఖిల్‌ తీవ్ర అస్వస్థతకు గురికావడంతో ఆస్పత్రికి తరలించి చికిత్స అందిస్తున్నారు. కుటుంబ సభ్యులు అతని ఆరోగ్య పరిస్థితిపై ఆందోళన చెందుతున్నారు. తండ్రి, అక్కను కోల్పోయిన నిఖిల్‌కు ఈ విషాదాన్ని ఎలా చెప్పాలన్నది కుటుంబానికి మరో వేదనగా మారింది.

వ్యవసాయ కష్టాలు.. అప్పుల ఒత్తిడి

కుటుంబ సభ్యుల వివరాల ప్రకారం.. శ్రీనివాసరావు వ్యవసాయంపై ఆధారపడి జీవనం సాగించేవాడు. సొంత భూమితో పాటు కౌలుకు భూములు తీసుకుని సాగు చేసినట్లు తెలిపారు. వ్యవసాయంలో పెట్టుబడులు పెరగడం, పంటలకు ఎదురైన ఇబ్బందులు, అప్పుల భారం వంటి సమస్యలతో కొంతకాలంగా ఆర్థిక ఇబ్బందులు ఎదుర్కొంటున్నట్లు పేర్కొన్నారు. ఈ పరిస్థితులు ఆయనపై తీవ్ర ఒత్తిడిని పెంచినట్లు కుటుంబ సభ్యులు తెలిపారు.

గ్రామమంతా కదిలివచ్చింది

తండ్రీకూతురిని చివరిసారిగా చూసేందుకు అప్పలనరసింహాపురంతో పాటు చుట్టుపక్కల ప్రాంతాల నుంచి పెద్ద సంఖ్యలో ప్రజలు తరలివచ్చారు. కన్నీటి పర్యంతమైన కుటుంబ సభ్యులను ఓదార్చడం ఎవరి వల్లా కాలేదు. బంధువులు, గ్రామస్తుల అశ్రునయనాల మధ్య తండ్రీకూతురి అంతిమయాత్ర సాగింది. ఒక కుటుంబాన్ని ఛిన్నాభిన్నం చేసిన ఈ ఘటన.. వ్యవసాయ కష్టాలు, అప్పుల ఒత్తిడి కుటుంబాలపై ఎంతటి మానసిక భారాన్ని మోపుతున్నాయో కళ్లకు కట్టినట్లు చూపించింది.