కులమతాలకు అతీతంగా కన్నీటి వీడ్కోలు.. హిందూ, ముస్లిం సోదరుల ఆత్మీయత
తరగతి గది నుంచి స్మశానం వరకు.. ‘స్నేహమేరా జీవితం’ అంటూ చాటిన బంధం
పేద కుటుంబంలో పుట్టి కార్మికుడిగా జీవనం.. అందరి మనిషిగా గుర్తింపు
ఫోన్ ద్వారా కుటుంబాన్ని పరామర్శించిన మాజీ మంత్రి సంబాని చంద్రశేఖర్.. పలు పార్టీల నాయకుల నివాళులు
కూసుమంచి/ ప్రజాపక్షం: కులం వేరు.. మతం వేరు.. రాజకీయ సిద్ధాంతాలు వేరు.. కానీ మనసుల మధ్య ఉన్న అనుబంధం మాత్రం ఒక్కటే! కూసుమంచి మండల కేంద్రంలో కనకం మైసయ్య అంతిమయాత్ర ఈ మానవీయ సత్యాన్ని మరోసారి చాటిచెప్పింది. ఎస్సీ మాదిగ సామాజిక వర్గానికి చెందిన మైసయ్య మృతితో క్రైస్తవ కుటుంబంలో విషాదం నెలకొనగా, హిందూ, ముస్లిం సోదరులు ఆయనకు ఆత్మీయంగా వీడ్కోలు పలికారు. వివిధ రాజకీయ పార్టీల నాయకులు సైతం పార్టీలకు అతీతంగా తరలివచ్చి నివాళులర్పించారు. చిన్ననాటి స్నేహాలు, కష్టపడి బతికిన జీవితం, అందరితో కలిసిమెలిసి ఉండే స్వభావం.. ఇలా మైసయ్య జీవన ప్రయాణం కూసుమంచిలో మతసామరస్యానికి, మానవ సంబంధాలకు ప్రతీకగా నిలిచింది.
పేద కుటుంబంలో పుట్టి.. శ్రమనే నమ్ముకుని!
కనకం మైసయ్య (54) సాధారణ కుటుంబంలో జన్మించి, జీవితంలో ఎన్నో కష్టాలను ఎదుర్కొంటూ ముందుకు సాగారు. కారు డ్రైవర్‌గా, ట్రాక్టర్ డ్రైవర్‌గా, కార్మికుడిగా పనిచేస్తూ జీవనం సాగించారు. శ్రమను నమ్ముకుని బతికిన ఆయన కూసుమంచి మండల కేంద్రంలో అందరితో ఆత్మీయంగా మెలిగేవారు. స్థానికంగా పలువురితో సన్నిహిత సంబంధాలు కలిగి, అందరికీ తెలిసిన వ్యక్తిగా గుర్తింపు పొందారు. కష్టపడి పనిచేస్తూ జీవించిన ఆయన.. తన చుట్టూ ఉన్నవారితో ఏర్పరచుకున్న అనుబంధాలనే నిజమైన సంపదగా మిగిల్చుకున్నారు.
చిన్ననాటి స్నేహం.. జీవితాంతం నిలిచిన అనుబంధం!
మైసయ్య జీవితంలో చిన్ననాటి స్నేహాలకు ప్రత్యేక స్థానం ఉంది. ఆయన క్లాస్‌మేట్లలో మాల సామాజిక వర్గానికి చెందిన అంతోటి వెంకన్న, ముస్లిం సామాజిక వర్గానికి చెందిన మహమ్మద్ సోయబ్‌ ఇంకా కట్ల నాగేశ్వరరావు ఎమ్మార్పీఎస్ రాష్ట్ర బాధ్యులు ఈదయ్య తో ఉన్న అనుబంధం ఇందుకు నిదర్శనం. చిన్నతనంలో సోయబ్‌ను ఎత్తుకుని ముద్దాడినంత ఆత్మీయతతో మైసయ్య మెలిగేవారని గుర్తుచేసుకుంటున్నారు. బాల్యంలో మొదలైన ఈ స్నేహబంధం కులమతాల గోడలను ఎప్పుడో దాటిపోయింది. మైసయ్య అంతిమయాత్రలో సోయబ్‌తో పాటు పలువురు ముస్లిం సోదరులు పాల్గొనడం ఆ అనుబంధానికి ప్రతీకగా నిలిచింది.
తరగతి గది నుంచి స్మశానం వరకు.. ‘స్నేహమేరా జీవితం’
చిన్నప్పుడు కలిసి చదువుకున్న స్నేహితులు.. కాలక్రమంలో వేర్వేరు వృత్తుల్లో స్థిరపడినా, వారి మధ్య ఉన్న అనుబంధం మాత్రం చెక్కుచెదరలేదు. జీవిత ప్రయాణంలో ఎన్నో మార్పులు వచ్చినా, స్నేహానికి కులం, మతం, ఆర్థిక స్థితిగతులు అడ్డుకావని మైసయ్య అంతిమయాత్ర చాటిచెప్పింది. ఒకప్పుడు తరగతి గదిలో పంచుకున్న బాల్య జ్ఞాపకాలు.. చివరికి అంతిమ వీడ్కోలు సమయంలో భావోద్వేగాలుగా మారాయి. స్నేహితుడిని కోల్పోయిన బాధలో ఆయనకు చివరి వీడ్కోలు పలకడానికి తరలివచ్చిన వారి ఆత్మీయత అక్కడి వాతావరణాన్ని విషాదభరితంగా మార్చింది.
పార్టీలకు అతీతంగా నివాళులు
కనకం మైసయ్య మృతి పట్ల సంతాపం వ్యక్తం చేస్తూ కాంగ్రెస్, బీజేపీ, బీఆర్ఎస్, సీపీఎం తదితర పార్టీల నాయకులు నివాళులర్పించారు. తన చిన్నతనం నుండి కాంగ్రెస్ పార్టీ అభిమానిగా పెరిగిన మైసయ్య కాలక్రమంలో బిఆర్ఎస్ పార్టీ నాయకుడు పాలేరు మాజీ ఎమ్మెల్యే కందాల ఉపేందర్ రెడ్డికి అభిమానిగా కూడా మారారు. కాంగ్రెస్ పార్టీ ఖమ్మం జిల్లా ప్రధాన కార్యదర్శి ఎం.డి. హఫీజుద్దీన్, కూసుమంచి మండల కాంగ్రెస్ పార్టీ అధ్యక్షుడు బజ్జూరివెంకటరెడ్డి, మాజీ ఎంపీటీసీ మాదాసు ఉపేందర్‌రావు, గ్రామ సర్పంచ్ కొండ కృష్ణవేణి, మహిపాల్, బీజేపీ మండల నాయకుడు గుండా ఉపేందర్‌రెడ్డి, బిఆర్ఎస్ పార్టీ రాష్ట్ర నాయకులు నలగాటి ప్రసన్న కుమార్ నలగాటి నాగయ్య మక్కపల్లి రామకృష్ణ దాసరి వెంకన్న సీపీఎం కార్మిక నాయకుడు చావ వెంకటేశ్వర్లు, తదితరులు మైసయ్య మృతదేహానికి నివాళులర్పించి కుటుంబ సభ్యులకు సానుభూతి తెలిపారు.
ఫోన్ ద్వారా పరామర్శించిన మాజీ మంత్రి
మైసయ్య మృతి విషయం తెలుసుకున్న మాజీ మంత్రి సంబాని చంద్రశేఖర్ ఫోన్ ద్వారా కుటుంబ సభ్యులను పరామర్శించారు. మృతుడి కుటుంబానికి సానుభూతి తెలియజేస్తూ, ఈ విషాద సమయంలో వారికి మనోధైర్యం కలగాలని ఆకాంక్షించారు.
మైసయ్య జీవితం.. సమాజానికి ఓ సందేశం
జీవితమంతా శ్రమిస్తూ, అందరితో ఆత్మీయంగా మెలుగుతూ సాగిన కనకం మైసయ్య ప్రయాణం ఒక విషయం గుర్తుచేస్తోంది. మనిషి గొప్పతనం ఆయన సంపాదించిన ఆస్తుల్లోనో, పొందిన హోదాల్లోనో ఉండదు.. ఆయన చుట్టూ ఉన్నవారి హృదయాల్లో సంపాదించుకున్న స్థానంలో ఉంటుంది. మైసయ్య అంతిమయాత్రలో కనిపించిన కులమతాలకు అతీతమైన ఆత్మీయత అందుకు నిదర్శనం. మతాలు వేరైనా మనసులు కలవొచ్చు.. కులాలు వేరైనా స్నేహాలు కొనసాగవచ్చు.. రాజకీయాలు వేరైనా మానవత్వం ఒక్కటిగా నిలవవచ్చు. కూసుమంచిలో కనకం మైసయ్య అంతిమయాత్ర ఇదే సందేశాన్ని సమాజానికి అందించింది.
స్నేహం తరగతి గదిలో మొదలై.. జీవితాంతం కొనసాగి.. చివరి వీడ్కోలు వరకు తోడుగా నిలిచినప్పుడు, అదే నిజమైన మానవత్వం!
కామెంట్‌ను పోస్ట్ చేయండి